Home Agriculture കരിപൂര്‍ വിമാനാപകടം; നടുക്കം മാറാതെ കുരുന്നുകള്‍

കരിപൂര്‍ വിമാനാപകടം; നടുക്കം മാറാതെ കുരുന്നുകള്‍

by Sruthi Bhat Kadambery

ദുരന്തമുഖത്തെ വേദനിപ്പിക്കുന്ന കാഴ്ചകളിലൊന്ന്, എന്താണ് ചുറ്റും നടക്കുന്നതെന്നറിയാതെ അപകടങ്ങൾക്കു മുന്നിൽ പകച്ചു നിൽക്കുന്ന കുട്ടികളാണ്. ഇന്ന് കരിപ്പൂർ വിമാനത്താവളത്തിൽ അപകടം നടന്നപ്പോഴും ആദ്യം പുറത്തു വന്ന കാഴ്ചകളിലൊന്ന് അച്ഛനമ്മമാരിൽ നിന്നും വേർപ്പെട്ടുപോയ കുട്ടികളാണ്. ആ കുട്ടികളുടെ രക്ഷിതാക്കളെ കണ്ടെത്താൻ കേരളം മുഴുവൻ ഒന്നു ചേരുകയും അവരിൽ പലരെയും ഇതിനകം കണ്ടെത്തുകയും ചെയ്തു.

Read more: Karipur Airport Plane Accident: കരിപ്പൂരിൽ വിമാനാപകടം: മരണസംഖ്യ ഉയരുന്നു

ഈ ദുരന്തരാത്രിയിൽ, കൊണ്ടോട്ടി പുളിക്കൽ ജനറൽ ആശുപത്രിയിലും അഞ്ചു വയസ്സിനു താഴെ മാത്രം പ്രായമുള്ള മൂന്നു പെൺകുട്ടികൾ അവരുടെ രക്ഷിതാക്കളെ പ്രതീക്ഷിച്ചിരിക്കുകയാണ്. ഇതിൽ രണ്ടു കുട്ടികളുടെ ബന്ധുക്കൾ ഇതിനകം ആശുപത്രി പരിസരത്ത് എത്തിക്കഴിഞ്ഞുവെങ്കിലും മൂന്നാമത്തെ കുട്ടിയുടെ ബന്ധുക്കൾക്കു വേണ്ടിയുള്ള കാത്തിരിപ്പിലാണ് കുട്ടികളെ ആശുപത്രിയിൽ എത്തിച്ച സന്നദ്ധ പ്രവർത്തകർ.

നല്ലളം സ്വദേശി നൗഷീറിന്റെ മകൾ ഫാത്തിമ നൂഹ, തിരൂർ സ്വദേശി​ അനസിന്റെ മകൾ ഫിദ, നസ്റ എന്നിവരാണ് ഇപ്പോൾ പുളിക്കൽ ആശുപത്രിയിൽ പ്രവേശിപ്പിക്കപ്പെട്ട കുട്ടികൾ. ഇതിൽ നസ്റയുടെ ബന്ധുക്കളോ മാതാപിതാക്കളോ ഇതുവരെ എത്തിച്ചേർന്നിട്ടില്ല. അപകടത്തിൽ നിന്നും തലനാരിഴയ്ക്ക് രക്ഷപ്പെട്ടെങ്കിലും അപകടത്തിന്റെ ഷോക്കിൽ നിന്നും കുട്ടികൾ ഇതുവരെ മുക്തരായിട്ടില്ലെന്ന് കുട്ടികൾക്ക് ഒപ്പമുള്ള സന്നദ്ധ പ്രവർത്തകനായ ഫസൽ ഇന്ത്യന്‍ എക്സ്പ്രസ്സ്‌ മലയാളത്തോട് പറഞ്ഞു.

Read more: വിമാനം വീണത് 35 താഴ്ചയിലേക്ക്; അപകടത്തിനിടയാക്കിയത് കനത്ത മഴ

“ദൈവാനുഗ്രഹത്താൽ കുട്ടികൾക്ക് മൂന്നുപേർക്കും പരിക്കുകളൊന്നുമില്ല. പക്ഷേ അപകടത്തിന്റെ ആഘാതത്തിലും ഞെട്ടലിലുമാണ് കുട്ടികൾ ഇപ്പോഴും. നിർത്താതെ കരച്ചിലാണ്. രണ്ടു കുട്ടികളുടെ ബന്ധുക്കൾ ഇതിനകം തന്നെ ആശുപത്രിയിൽ എത്തിച്ചേർന്നിട്ടുണ്ട്. മൂന്നാമത്തെ കുട്ടിയുടെ ബന്ധുക്കൾക്കു വേണ്ടി കാത്തിരിക്കുകയാണ്,”ഫസൽ പറഞ്ഞു.

വെള്ളിയാഴ്ച രാത്രി 8 മണിയോടെയാണ് കരിപ്പൂർ വിമാനത്താവളത്തിൽ റൺവേയിൽ നിന്ന് വിമാനം തെന്നിമാറി അപകടമുണ്ടായത്. Air India Express 1344 ദുബായ്–കോഴിക്കോട് വിമാനമാണ് അപകടത്തിൽപ്പെട്ടത്. അപകടത്തിൽ 16 പേർ മരിച്ചു. പൈലറ്റും സഹ പൈലറ്റും ഉൾപ്പടെയുള്ളവരാണ് അപകടത്തിൽ മരിച്ചത്.

കൊണ്ടോട്ടി- കുന്നുംപുറം റോഡിൽ മേലങ്ങാടി വഴിയുള്ള ക്രോസ് ബെൽറ്റ് റോഡിന്റെ ഭാഗത്തേക്ക് വിമാനം വീഴുകയായിരുന്നു. ടേബിൾ ടോപ് റൺവേ ആയതിനാൽ വിമാനം നിയന്ത്രിക്കാൻ കഴിയാതെ പോയതാണ് അപകട കാരണമെന്നാണു പ്രാഥമിക നിഗമനം. നാട്ടുകാരുടെയും പൊലീസിന്റെയും നേതൃത്വത്തിലാണ് രക്ഷാപ്രവർത്തനം തുടരുന്നത്.

Related Articles

Leave a Reply

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy
%d bloggers like this: